આ હમણાં જ આવ્યું મને વાંચવામાં,
કે પંખી પડ્યું – ઠેસ વાગી હવામાં.
તમે પ્રેમથી રોજ પૂછો છો કિંતુ,
કહો કાયમી ક્યાંથી રહેવું મજામાં?
હરણ આજીવન હાંફતું રહી ગયું ને,
તમે થઈ ગયા ડોક્ટરેટ ઝાંઝવામાં.
સુથારીને પૂછશો તો એવું જ કે’શે,
મને બારી દેખાય છે ઝાડવામાં.
એ દરિયાની ઉંડાઈ જાણી ગયો છે,
મને એટલે રસ પડ્યો ખારવામાં.
લે ! આ ભીંત તોડી ને દરવાજો કીધો
હવે શું નડે છે તને આવવામાં?
તને ફૂંકમાં ખૂબ શ્રદ્ધા હતી પણ,
મજા શું પડી આ દીવો ઠારવામાં?